股票經紀的情色故事

(以下內容以全廣東話寫作,情節有真有假,如有雷同,實屬巧合。)

(本故事為 2B 級無聊創作,不喜勿讀。)

阿蓮係個失婚婦人,早幾年老公又唔生性,出面收埋幾件。結果,咪搞到離婚囉,仲走埋佬o添呀!最慘以前做少奶奶有老公養,雖然話家用月月有比,但阿蓮就同一般女人一樣,鐘意買名牌手袋,LV、Gucci 買完一個又一個,結果都無乜私己錢淨咯。

雖然阿蓮佢已經三十有七,好在都算保養得宜,一個禮拜去做一次 facial,皮膚又白又滑。再加上五呎四吋高少少肉地的標準身型,一對竹筍乳,腰短腳長長。睇落最多似 30 出頭,出街都仲好多男人「打雀」咁眼望佢o架。

記得舊時老公成日都話,o的股票好搵錢,但係阿蓮佢讀書唔多,讀到中五就無讀落去,走o左去嫁人,都莫講話股票啦,記o的 number 咩 0998 (中信銀行)、3983 (中海石油化學)、1398 (工商銀行) 咁呀記到頭都暈呀!但係山窮水盡,又要維持生活現狀,唯有頂硬上去搵工。既然股票咁賺錢,阿蓮就決定去考個經紀牌,一於自己賺錢時又賺埋人地o的佣金!阿蓮心諗:「咪同我計買 食送 錢差唔多!」

阿蓮第一日返學,就引來唔少的同學仔喪「目及」,梗係啦,阿蓮佢著o左條 deep-V 碎花 one-piece 裙,透透o地少少 sexy,加上鬼整佢唔知點解成班同學得佢一個係女人,就好似比班餓狼包圍著的小羔羊一樣。其中一個叫 Peter 的,一見到阿蓮已經打定主議,今晚就要食o左呢隻小羔羊。

Peter 借o的意坐去阿蓮隔離,又借筆又借簿又不停撩阿蓮傾計。Peter 今年都四十,一個普通的不收邊幅中坑,大大個肚腩,著o左件格仔恤打條呔,睇落最多只可以話係忠忠直直。可能阿蓮之前比個衰老公呃過,見阿 Peter 咁o既款就無咩戒心。所以當 Peter 話要放學之後去食飯飲o野,順便教下阿蓮一o的股票知識,阿蓮都無反對,仲不停講話唔好意思。

去到果間平民化的日本料理,Peter 都無話食言,不停咁教阿蓮果o的股票知識,好多專有名詞阿蓮都聽唔明。乜o野又 call 又 put,阿蓮聽到一頭霧水。Peter 就襯機捉住阿蓮對手,就教佢,「o拿~ 你整o的手勢咪好記o的囉,手向左就即係 call,手向右就即係 put,明唔明呀?」講o野果時又哄埋去阿蓮個耳仔邊,搞到阿蓮心如鹿撞。其實阿蓮聽極都唔明 (可能 Peter 教得唔好啦),加上佢都幾年無同男人行埋,忽然有個男人同自己講野哄到咁埋,即時個人軟晒,個腦都諗唔到o野啦。不過阿蓮就覺得女人要有返少少矜持,望一望表都已經 10pm,於是佢話:「不如叫o的o野食先啦 Peter 哥~」

Peter 就話好,一o黎仲叫左 2 支 Sake,諗住隊到阿蓮醉醉o地好辦事。點一知阿蓮原來都好好酒量,以前成日都陪老公去應酬,紅酒白酒係咁飲,隊極都唔醉。之但係咁,阿蓮都唔係咩三歲細路女,又點會唔知 Peter 想做咩丫,於是佢就提議埋單,仲問 Peter 可唔可以送佢返屋企,一個女人自己住加上飲o左酒,驚有危險咁話。

Peter 就梗係話好啦,於是佢兩個就齊齊埋單上o左的士,絕塵而去。

(完)

------------

故仔的靈感源頭其實係源自尋晚我去中環和民同男友仔食飯,隔離檯果一男一女中年茂丙響度罷住張四人檯上私人補習班,應該係個女人學做股票經紀,就問果個中坑同學一o的o野。呢兩兜友又唔叫o野食又唔叫o野飲講o野又鬼咁大聲,搞到我都食慾不振,煩爆。

唔怕話比大家知,我的其中一個兒時心願(!)係幫報紙風月版寫咸故,少少咸,多多趣果隻。呢一篇呃o左大家,其實一o的咸o野都無的故事,係向各位風月版寫打油詩寫咸濕故仔的大佬的 tribute 之作。我向你o地致敬!

因為要扮得似都好難寫o架原來!

1 則留言:

anf 說...

被騙!!